Saturday, December 17, 2011

طريقتي في علاج تشققات الكعبين





اليوم اكتب لكم طريقتى المجربة لعلاج تشققات الرجلين بعد ما حصلت على كعوب ناعمة وخالية من التشققات 100% والحمد لله وبعد ما كنت يأست ان كعوبى ترجع زى زمان وجربت كريمات كتير ووصفات كتير

اقولكم على الغلطات اللى كنت بعملها الاول واللى كانت بتخلينى ايأس بسرعة
اولا اسمع عن اى
كريم سحري يزيل التشققات فأشتريه واحطه ولما لا اجد نتيجة اتوقف
ثانيا الاهمال والوقوف حافية خصوصا ساعة التنفيض وتنظيف البيت


والفكرة فى علاج التشققات هى ان طبقات الجلد الخارجية تجف فتتشقق ولايوجد كريم فى الدنيا يلحم الطبقات التى تشققت وتلفت ولكن العلاج يكون بمحاولة ازالة هذه الطبقات بالتدريج مع المحافظة على ترطيب الجلد المستمر للمساعدة فى وصول الطبقات الداخلية السليمة للسطح يعنى مفيش واحد تفكر ان الطبقات اللى نشفت دى هترجع زى الأول لاء احنا هنشيلها واحدة واحدة لحد مانوصل للسليم وهذا يستغرق من اسبوعين لشهر حسب شدة وعمق الشقوق يعنى لو سطحية او متوسطة ممكن يتم العلاج فى اسبوعين ولو لا قدر الله عميقة وواصلة للأعصاب أو الدم ( المصابين بيها بيشعرو بألم مكانها )ممكن شهر اهم حاجة الصبر والنتيجة اقسم بالله كعوب سليمة وناعمة 100%

كفاية رغى وندخل فى الموضوع

هتحتاجى
1-مبرد قدمين حامى شوية
2-واحد من الكريمات التالية : ميبو كريم أو كريم كارباميد أو مرهم سالبيت ولو لم يتوافر عندك اى منها ممكن فازلين او جليسوليد الأحمر او حتى نيفيا الأزرق يعنى اى كريم تقيل
طبعا لاحظو انى قلت اى من الكريمات السابقة يعنى واحد بس المتوفر عندك المهم الطريقة الصحيحة( مش عيزة تغرمكو)
3- اكياس بلاستيك او كلينج فيلم اللى هو الرول الشفاف اللى بيغلفو بيه الجبنات واللانشون فى السوبر ماركت
(لو صعب تشتريه فكى اللى متغلف بيه اطباق الجبنة او اللانشون بس المهم يكون نضيف)مش عيزة تغرمكو عالآخر هههههه

الطريقة
1-حطى رجليكى فى مية دافية مش ضرورى سخنة أوى وشوية رغوة شاور او شامبواللى موجود عندك (أظن مفيش اوفرمن كدة)وسيبيهم شوية وطلعى ونشفى بس مش أوى يعنى شيلى المية بس وافركى كويس اوى يعنى تشوفى الجلد الميت وهو نازل (على فكرة لو فركتى ورجلك فيها مية الجلد الميت مش هيطلع)
2- نشفى رجليكى كويس وادهنى الكريم المرطب اللى عندك على الكعبين ودلكى يعنى تحسى ان الجلد بيشرب
3- دى اهم خطوة واللى من غيرها مش هتشوفى النتيجة المطلوبة وهى ارتداء الأكياس على الرجلين او لف الكلينج فيلم على الكعبين جيدا وارتداء شراب صوف عشان يعمل حرارة وحاولى يكون بالليل وتنامى بيه للصبح

الخطوات اللى فاتت دى بأى هنعملها كل أد ايه؟؟
بصو بأة اخر خطوتين اللى هما الترطيب ولبس الكيس والشراب دى خليها كل يوم بالليل
اما الخطوة الأولى اللى هى الصنفرة دى خليها مرتين فى الأسبوع وممكن يوم بعد يوم هتحصلى على نتيجة اسرع يعنى انتى وشطارتك , ونصيحتى للى رجليها بتشقق ماتمشيش حافية صيف او شتا حتى بعد ما التشققات تروح بإذن الله بلاش تمشى حافية عشان ما ترجعلكيش تانى ورطبى رجلك من وقت للتانى يعنى خلي علبه كريم قريبة منك وحطى كل ما تفتكرى


طيب فى كتير جربو كدة والتشققات ماراحتش لييه؟ عشان زى ما قولتلكم التشققات مش بتلحم دة احنا بكدة بنشيل الجلد الميت ونساعد السليم انه يطلع بدون ما يتشقق واللى جربت مرة او اتنين وبطلت اكيد مش هتوصل لحاجة
لااااااااااازم الصبر والاستمرار يعنى اللى عارفة نفسها بتجرب الحاجة مرة او اتنين وتزهأ بلاش احسن

وصدقونى انا كنت متضايقة جدا من منظر كعوبى لكن دلوأتى الحمد لله رجعت زى الأول وانا من بداية استعمالى للطريقة دى كنت بلاحظ الفرق لكن قلت انى مش هتكب لكم الطريقة الا لما اوصل للنتيجة النهائية اللى ترضينى عشان تكون الوصفة مجربة وأتأكد انها فعالة وما اضيعلكوش وقتكو من غير ما اكون متأكدة من النتيجة

واكرر مفيش كريم سحرى مهما كان تمنه بيلحم الجلد اللى اتشقق ابدا يعنى مش اى كريم تسمعو عنه تشتروه الفكرة كلها فى
الترطيب بأى مرطب قوى وازالة الجلد القديم اللى اتشقق

المصدر

0 Comments:

Post a Comment